أسعد الله صباحكم


مممم تعرفوا لما الواحد مو عارف من وين يبدأ
هي أنا الأن


صار لي فترة طويلة غايبة وحتى تسجيل الدخول قليل
بس ربنا وحدهـ يعلم بالضغط النفسي اللي عايشينه هالأيام

الأمتحانات ومشاغل الحياة ومشاكل البيت كلها من سنة صارت سهلة وتافه
بس اللي مو تافه الوضع اللي وصل له بلدنا .. يعني لما تسمعوا أحد يقول لكم
في بسوريا دمار شامل صدقوه لأنو هذا الحاصل للأسف ..

كنت أكرهـ الفيس بوك وغيره من المواقع لكن الأن تغير الوضع
سكتنا كثير وتغاضينا كثير وصار الوقت اللي الكل يتكلم فيه وما يسكت
لأنو الساكت هالأيام متواطىء وخائن ..

من فترة أقل من شهر عشنا أيام صعبة جداً من خوفنا على أهلنا
بس الحمد لله عدت على خير و من وقتها والتوتر والقلق زادوا عندي
وقررت أني أعمل شي وما أسكت

سجلت بالفيس بوك وبدأت بنشاط بسيط بأغلب صفحات الثورة
وأن شاء الله رح يزداد هالنشاط بعد الأمتحانات

لما أفكر أنو أنا شو قدمت لوطني بلاقي صفحتي فاضية
و أول شي لازم أعمله أني أنجح بدراستي مشان يستفيدوا بلدي وأهلي مني
وثاني شي تقديم كل شي بقدر عليه عبر هالشاشة ويارب أقدر

سجلت دخول هون أكثر من مرة و حاولت أكون مثل الأغلبية
بس ما قدرت لأني وين ما ألتفت الأقي صورة أطفالنا وشبابنا قدامي
لدرجة أني بعدت عن كل الناس وقطعت تواصلي معهم بس مشان ما يحسوا أني أبالغ أو غيرهـ
كل الصبايا اللي حولي مو من بلدي يعني مهما حكيت ما رح لاقي وحدهـ تفهم علي وتحس بقيمة كلامي ودمعتي إلا لو كانت جربت ..
ويارب ما أحد يجرب هالشعور ويحفظ بلاد المسلمين كافة ..

كلامي هذا شو ما بدكم تعتبروه أعتبروه
فضفضة .. أعتذار .. كلام فاضي من دون معنى .. على راحتكم

أخر شي حابه أحكيه أنو مدونتي رح تكون جزء من نشاطي الشبه يومي ع الأنترنت
رح أنشر كل شي يستحق النشر لحتى يوصل لأكبر عدد من الناس

اللي يحب أنه ينشر هالشي بصفحاته الخاصة ويساعدنا أو يتابع أخبارنا يتابع المدونة
واللي مو حاب من الأن يغسل أيدهـ من هي الصفحة لأنها ما رح تفيده بشي


.
.

^
^


والله أني ما بعرف كيف كتبت هالسطور وليش كتبتها من الأساس
أعتقد أنو أعراض الأكتئاب بدأت تترجم لأحرف بعد صمت طويل


لا تنسونا من دعائكم

عذراً دمشق ...
لقد أبكوكِ
عذراً دمشق ..
لقد دمروكِ
عذراً دمشق ...
لقد حرقوكِ
ولم يكتفوا بذلك فقد شوهوكِ
عذراً ... لقد جرحوكِ
وطعنوا فيكِ .. لا بل عذبوكِ وانزلوا الغضب عليكِ و أحزنوكِ
فدموعي لاتكفي حسرةً عليكِ
وقلبي يتقطع لما جرى فيكِ



عذراً يا حبيبتي ..
فما بيدي حيلة لكي أشفيكِ
ولا لديّ درع لكي أحميكِ



لوكان الأمر لي لجعلت من قلبي مسكنكِ
ومن عينيّ أسواركِ
وجعلت من حضني حصنكِ


عذراً دمشق ...
عذراً والله لو قلتها آلاف المرات لم تكفيكِ
عذراً ولو ذرفت الدمع دماً لم ترويكِ
فاعذريني يا حبيبتي لما فعلوا فيك



عذراً دمشق

يقول هادي [ فجع قلبي وأنا أحمل الطفل الشهيد وقد أصيب برصاص قناصة في قلبه...
ليصعقني الأطباء بقولهم استشهد والده أيضا برصاص قناصة في قلبه...حسبنا الله ونعم الوكيل ]


الأب وأبنه في نفس اللحظة
والأثنان أتت الرصاصات في قلوبهم ..


ضربه الله بسوط عذاب من رماكم يا أحبة







مريم حبيبة الكل




بنت هذا الشهيد البطل [ رامي السيد]
أول صحفي في حمص حاول نقل الحقيقة واستطاع نقل ما قٌدر
قبل أن يستهدفه قناصة النظام .. حاول الأطباء أسعافه ولكن الموت كان أسرع ..!





مريم كبرت وصارت تتحجب بس بعيد عن عيون أبوها ..






أبناء الشهيد الصيدلاني فادي عبد السميع الأتاسي
لم ننسى أباكم ولن ننساكم






غياث غياث مطر وُلد بعد أستشهاد والده
فقررت العائلة تسميته على أسم والده الشهيد ..




أبن الـ 26 ربيعاً

رحمك الله يا غياث

لم يعرفه السوريين إلا لفترة قصيرة كان يشارك في تنظيم مظاهرات مدينة داريا
ولكن الأمن أعتقله و فعل مالم يفعله الصهاينة بالفلسطينيين
المقاطع التي نشرت لتعذيبه لا يستيطع أحد مشاهدتها من بشاعة فعلهم به

غياث لم يٌنسى أسمه من ألسنتنا ولا قلوبنا
كل ماذكرت قافلة الشهداء نجد رامي وغياث في المقدمة


^

لن ننساكم من دعائنا ولن يضيع دمكم هدراً
ولن نسامح من يحملون دمائكم في رقابهم ما حيينا

صباح التوكل على الله والثقة بنصرهـ

.
.

أعصابنا تلفت وربي
لو نمنا بالنهار نقوم المسا نلاقي صايرة تفجيرات
ولو نمنا بالليل نقوم الصبح وحصيلة الشهداء من القصف الليلي وصلت للعدد الفلاني

طول الليل قصف على الرستن وحمص ودرعا
وما يكفي هذا لحتى تكمل معنا وينشغل بالنا على خالي


يالله مالنا غيرك يالله ..

الشخص المهم فـــ حياتك ليس هو الشخص الذي تشعر بوجوده
ولكنه الشخص الذي تشعر بغيابه ♥

لـ د/ إبراهيم الفقي – رحمه الله


^

وما أكثر الذين نشعر بغيابهم !

كثيرون هم الذين يستمعون إلينا
ولكن قليلون هم الذين يشعرون بإلمنا !

مين صاحي الليلة يقوم يصلي ركعتين ويدعي للجيش الحر بدمشق
في أخبار عن مقتل أكبر الضباط عند الـ .... بشار
وأهل الشام على أعصابهم لأنها شعلت الحرب الحقيقية هلأ بالعاصمة
ودام الشغلة وصلت لوسط دمشق معناها الفرج قرب
وبعد شوي رح يتأكد الخبر بشكل رسمي


دعـــــــــــواتـــــــــــــــكــــــــــــــــم

عروستنا الحرية ..!
أنخطبت بدرعا ..
انكتب كتابا بحمص ..
الجاهه حموية ..
والفستان من ادلب الخضرا ..
العرس باذن الله بالشام ..
والعزايم على حلب
المهر غالي كثير ..
دم وأرواح واعتقالات ..
بس لعيونك يا عروس ،
لعيونك يا حرية ،
شهر العسل بدوما ،باللاذقية ،ببانياس،بالقامشلي بدير الزور ،بكل محافظات سورية
بس العريس :: شهيد والشهيد حبيب الله ..

مابدي سافر ع [ايطاليا] ولا بدي شوف البندقية -
حتى [باريس] مابدي اياها ومو ضروري أتصور جنب برج ايفل-
و [دبي] مو لازم زورها ومابدي اتمشى بمنتجعاتها -

.انا بسْ بدي سافر عَ بلدي [سورياْ] وعيشْ فيها بكلْ كرامة وحِرية وشوفْ اهلي وناسي وكلْ رفقاتي ..
.انا بسْ بدي اسجدْ ع ترابها وأدعي ربي أنو يحفظها من كل شرْ ..