المساعد الشخصي الرقمي

مشاهدة النسخة كاملة : حياة البساطة


пαнεɔ
05-06-2017, 02:52 PM
||



تقول واحدة فاعلة خير. ..في يوم رحت اوزع ارزاق على العوايل بالمرقب وحلة القصمان والاحياء اللي حولها انا وعيالي ( عندي ميني باص )
قالت واحدة من الصوماليات. في عايلة سعودية محتاجة. ياليت تشوفونهم. وورونا سكنهم. يبعد عن بيت الصومالية حول كيلو ونص او كيلوين اللي بحي ثلم ...
من بكرا اخذت معي زميلات لي بالعمل الخيري ورحنا لهم ، طقينا الباب اكثر من مرة. وبعدها ردت علبنا حرمة. قالت مانبي احد يزورنا ولا حنا زايرين احد ..
قلنا لها اسماء عوايلنا وترجيناها تفتح الباب. .. فتحت الباب ودخلنا البيت. صغير وقديم تفوح منه العراقة وريحة البخور ودهن العود والهيل وحرمتين فيه عليهم لبس اول.
ثوب احمر منقط وسروال خط البلدة. وشعرهن احمر من الحنا مفروق بالوسط وشيلة خشم البلبول ... سولفنا معهم.
قالت واحدة لاختها منيرة. جيبي القهوة. .. جابت قهوة بدلة ريحتها تشق وتمر بطاسة قضار .. المهم قلنا لهم وايش حاجتكم ؟.
قالت العفو والعافية. ،، حنا بخير ونعمة .. يا نسكن بفلل بشمال او شرق الرياض يانكون محتاجين. ..!!
قلنا مين يصرف عليكم. ؟؟ قالت خيرنا كثير .. بس مانبي الحياة الجديدة.
انا واختي ترملنا بدري. وعيالنا كبروا. وكل راح بطريقه وحنا مانبي نجلس عند احد وهذا بيت ابونا صلحناه وسكناه من ٢٠ سنة ..
في رمضان نسكن مكة وما نرجع الا بعد صيام الست عندنا بيت بمكة من اول هدوه بالتوسعة وثمنوه لنا واشترينا شقة قريبة من الحرم ..
قلنا لها من بجيب حوايجكم. قالت في واحد سوداني اسمه محجوب فقير وابو عيال ندفع لها الف بالشهر ويقضي حوايجنا.
ويسدد فواتيرنا قلنا وعيالكم يزورونكم قالوا. لا. مايبون يدخلون مناطق شعبية.
وضحكت. ... قالت يبعثون السواق ياخذنا يوم الجمعة.
يجتمعون على الغدا عند الكبير بس مايقصرون. يكلمونا كل يوم ومصلحين لنا اجنحة في بيوتهم. ويبونا نسكن عندهم. بس حنا نعيي
قالت اشوف عيونكم تتلاقط 😂. تعالوا شوفوا بيتنا. البيت نظيف بسيط مافيه تلفزيون ولا خدامة ولا كنب ولا سراير.
مطبخ جولة جاز ودولاب صغير فيه مواعين كأنهم نجوم تلمع من النظافة حتى فرشهم على الارض .
في سجادتين صلاة مفروشة. ومساند مصاحف. .ماشاء الله والمجلس زولية ومساند.
والحمام تحت بيت الدرج. وعربي .. سألتها. ام مين ؟؟ ( ماتبي تعلم ) قالت هذي منيرة. وانا جهير ..
قلنا لها ليه ماتبون تزورن احد ؟؟ الجار له حق عليكم. ؟؟ قالت جار اول مو هلحين. كلهم غرب ماندري وايش طينتهم ..
قبل لانطلع. قالت امانة لاتعلمون احد بمكانا
قلنا لهم نقدر حنا نزوركم. قالت لا مانبي احد يشغلنا عن طاعة ربنا.. بس جزاكم الله خير على فعل الخير.
وحنا بنعطيكم مبلغ للصدقات راحت جهير جابت لنا الف ريال قالت هذا الموجود بالبيت وزعيه لمستحقينه

الصدق غبطناهم. على حياة البساطة😢

||

مُزُنْ
06-06-2017, 01:02 AM
اي نعم
جميلة حياة البساطة
يعطيك العافية

sмσ єηѕαη
06-06-2017, 01:47 PM
بارك الله فيك